Omad kelsa, qo‘sha keladi deganlari rost ekan

0
139
marta ko‘rilgan.

2017 yil men uchun omadli, baxtli va sermazmun bo‘ldi. Shu vaqtga qadar hikoya va tarjimalarim ancha yig‘ilib qolgandi, yil davomida ularni kitob holiga keltirish va nashriyotlarga taqdim etish bilan mashg‘ul bo‘ldim.

Yozuvchilar uyushmasi tomonidan “Birinchi kitobim” ruknida “Yoningdagi baxt” nomli hikoyalar to‘plamim chop etildi. Omad kelsa, qo‘sha keladi, deganlari rost ekan. Birinchi kitobimdan so‘ng “O‘zbekiston” nashriyoti tomonidan “Jodugar yoxud ming yillik hayot” nomli qissam hamda “O‘qituvchi” nashriyotidan “Dunyodagi eng baxtli odam” nomli tarjima hikoyalar to‘plamim nashr etildi. 

Yil boshida xalqaro miqyosdagi Open Eurasian Book Forum & Literature Festival tanloviga bir qissamni taqdim etgandim. Kuz faslida saralangan ijodkorlar qatorida borligimni ko‘rib, juda xursand bo‘ldim. Sababi, bir necha yillardan buyon tanlovda qatnashib, finalgacha yetib bormagan edim-da. Mehnatlaringiz samarasini ko‘rish, xalqaro hay’at a’zolari tomonidan e’tiborga tushish – joriy yilning men uchun unutilmas kechishiga yana bir sabab bo‘ldi.

Yil yakuniga yetayotgan kunlarda esa, «O‘zbekiston Yoshlar ittifoqi mukofoti» sovrindori bo‘ldim. Nasr yo‘nalishi bo‘yicha «Yilning eng yaxshi yosh ijodkori», nominatsiyasida g‘olib deb topildim. 

Shaxsiy hayotga kelsak, shu yilning bahorida uchinchi farzandim tug‘ildi – onalik saodatini yanada teranroq angladim. Yaratgan egam menga shunday baxt berganiga shukurlar aytaman. Hozirda farzandlarim tarbiyasi bilan bandman. Ammo ijoddan sira chekinganim yo‘q. Qaytaga, kelgusida bajarishim, yozishim va tarjima qilishim kerak bo‘lgan ishlarni rejalashtirib, ayrimlariga kirishib ham ketdim. Masalan, yig‘ilib qolgan qisqa hikoyalar to‘plamimni o‘quvchilarga taqdim etish, jahon adabiyotidan yangi mualliflar asarlarini tarjima qilish o‘yi sira tinchlik bermayapti.

Yangi 2018 yil barcha ustozlarim va tengdoshlarim uchun ijodiy zafarlarga, yutuqlarga boy bo‘lishini tilayman. Yana bir gap, “Yoshlik”da diydorlashish nasib etsin. Har birimizning, jumladan, “Yoshlik” o‘quvchilarining xonadonida ham doimo yorug‘ kunlar bo‘lsin!

 

Nodirabegim IBROHIMOVA,

yosh yozuvchi

MULOHAZA BILDIRISH

Mulohaza kiritilmadi!
Ismi sharifingizni kiriting.