Халқ ботинидаги қудрат

0
64
марта кўрилган.

Кучли давлатдан кучли фуқаролик жамияти сари ўтиш…
Бу – мустақиллик йилларида мамлакатимиз раҳбарияти томонидан кўзланган асосий мақсадлардан бири. Турли нодавлат, нотижорат ташкилотлари, жамоат бирлашмалари ҳам шунга хизмат қиляпти.
Хўш, кучли давлатдан кучли фуқаролик жамиятига ўтишнинг белгилари нималарда кўринади? Бу, аввало, жамиятда бўлаётган жараёнларга нисбатан халқнинг дахлдорлик туйғуси ошишида, фуқароларнинг “Биз учун ҳаммасини давлат ҳал қилиб беради” деган истеъмолчилик кайфиятидан воз кечиб,  ўз фикри, дунёқараши билан ижтимоий-сиёсий жараёнларда фаол иштирок этишида намоён бўлади.   
Эътироф этиш лозим, сўнгги бир йил ичида  ў т и ш  белгилари, аломатлари яққолроқ сезиляпти. “Халқ билан мулоқот ва инсон манфаатлари йили” давлат дастурида кўзда тутилган режаларнинг ҳаётга босқичма-босқич татбиқ этилиши, “Халқ давлат идораларига эмас, давлат идоралари халққа хизмат қилиши шарт” деган шиор жамиятнинг асосий тамойилига айлангани бу жараённи тезлаштириб юборди, десак, ҳақ гапни айтган бўламиз.
Халқ билан маслаҳатлашиб, кенгашиб ишлаш, муаммоларга юқоридан пастга қараб эмас, балки қуйидан тепага қараб ечим ахтариш – бугунги куннинг талабини, кайфиятини белгилаяпти. Энг муҳими, масъул шахслар оддий одамларнинг сўзларига, фикру мулоҳазаларига қулоқ тутяпти, эшитяпти. Бу жараёнда муайян бир муаммонинг ҳал этилиши бир ютуқ бўлса, элдошларимизнинг дунёқараши ўзгараётгани, ўзига ва эртанги кунга ишончи ортаётгани ўн, юз карра каттароқ муваффақиятдир.
Ҳар бир шахс ўзининг, ўз фикрининг қийматга эга эканини, жамиятда ўз овози, ўрни борлигини тобора чуқурроқ идрок этяпти. “Ҳаммасини катталар билади, биз бир кичик одам бўлсак” деган ақида аста-секин ўз кучини йўқотяпти. Айнан шу “кичик одам”нинг ботинида қандай қудратли куч, салоҳият борлигини англатиш – биринчи галда зиёлиларнинг бош вазифаси экани бугун яққол аён бўляпти.
Президентимиз ижодкор зиёлилар билан учрашувда “…маданият ва санъат арбоблари ҳамиша жамиятнинг энг олдинги сафларида бўлиши, ўз асарлари, фаол гражданлик позицияси билан одамларни эзгу мақсад ва марралар сари бошлаши, илҳомлантириши керак эмасми?”  деган саволни ўртага ташлади. Бу риторик саволдаги  и л ҳ о м л а н т и р и ш ибораси одамларнинг қалбидаги, кўпинча ўзлари ҳам сезмайдиган қувватни, эзгу интилишларни қўзғаш лозим, деган маънони англатади.  
Қувонарлиси, бу борада ёшларимиз анча тетик, илдам. Турли ижтимоий сайтлар, тармоқларда навқирон авлоднинг долзарб масалалар бўйича билдирган соғлом фикрлари, муносабатини кўриб қувонасан киши. Уларнинг юрт, халқ тақдирига бефарқ эмаслиги одамни хурсанд қилади. Тўғри, уларнинг тажрибаси кам, баъзан ёшлик қизиққонлиги билан охиригача ўйланмаган хулосаларини ҳам баён қилади, лекин, муҳими, ниятлари холис – жамиятимизда кечаётган ислоҳотлар, янгиланишларда фаол иштирок этиш. Айни шу ўринда катта авлод зиёлилари бой тажриба ва янгича ёндашувларни уйғунлаштирган ҳолда ёшларга ўрнак бўлишлари, тўлқин-тўлқин келаётган навқирон авлодни тўғри ўзанга солишлари лозим, деб ўйлаймиз.
Шундагина устоз шоиримизнинг “Қачон халқ бўлсан, эй сен, оломон?” деган саволига ўрин қолмайди ва халқни денгизга ўхшатган бошқа улуғ шоиримизнинг “Бутун кучни халқ ичидан олайлик!” деган чақириғи ҳаётда тўлиқ ўз аксини топади.

МУЛОҲАЗА БИЛДИРИШ

Мулоҳаза киритилмади!
Исми шарифингизни киритинг.

This site uses Akismet to reduce spam. Learn how your comment data is processed.