Adavur
Baxmal, G‘allaorol, Bulung‘ur tumanlari shevasida “ancha”, “xiyla”, “talay” degan ma’nolarda ishlatiladi.
Masalan: “Uning yoshi adavur katta ekan”.
Arja
Xorazm viloyati shevasida “sandiq” degan ma’noni ifodalaydi.
Masalan: “U nima topsa arjaga tiqardi”.
Dussa
Buxoro viloyatining ayrim tumanlari shevasida “tutun” ma’nosida ishlatiladi.
Masalan: “Bu paytda tandir dusab yotardi”.
Lamma
Buxoro viloyati shevasida ishni tez bajarmaydigan, bemalolxo‘ja, boqibeg‘am, tepsa-tebranmas ayollarga nisbatan ishlatiladi.
Masalan: “Kampir doim kelini Saida lammaning yurish-turishidan noliydi”.
Lapa
Xorazm shevasida uchraydigan bu so‘z “konvert” degan ma’noni anglatadi.
Masalan: “Agar pochtachi lapa tashlab ketmaganida bundan bexabar qolardik”.
Soyavur
Namanganning ayrim qishloqlari shevasida “siyrak”, “sanjob” ma’nolarida ishlatiladi.
Masalan: “Bugun ertalab bozorda odam soyavur edi”.
Chilg‘ay
Samarqand viloyatining ayrim tumanlarida ishlatiladigan bu so‘z “umuman”, “butkul” degan ma’nolarni anglatadi.
Masalan: “Qarasam, qop bo‘shab, chilg‘ay bug‘doy qolmabdi”.
Hundi
Yakkabog‘ tumani shevasida “odamovi” degan ma’noda ishlatiladi.
Masalan: “Panjiboy deganlari shu bo‘lsa, hundi bir kas ekanda-a?!”
Jasur Jamirov to‘pladi.