4 daqiqada öqiladi

284 marta körilgan

Şaşqator nomalar

Ğulom Mirzo

(Turkum)

Dunyoni raqamlar boşqarmaydi.

 Gyote

* halovat

 

Har tong

ön ikki soatni

ön ikki söm kabi

hamyonimga solib jönayman

keçqurunga beş-olti soatlik

halovatli uyqu olib qaytgani.

 

 * keksalik eşigidagi yozuv

 

Yoşlikning

xatolari bilan

kirmoq erur manʼ.

Bunda ham

nuqson köp

senga atalgan…

 

*

Aslida

asliyat ham – tarjima.

Qalb,

Tafakkur,

Ruh

tarjimasi.

 

*

Bir oyoqli

simyoğoç

uç oyoqda turib

uni xörlayotgan

daydi itga

boqdi açinib…

 

* oçun

Texnika

odamning örnini

egallamoqda

odamiylik örni esa

böş qolmoqda

köpinça…

 

* istiqbol

Biologik tarzdan

elektron şaklga

ötar bölsa başar hayoti –

şeʼr bitarmi, qiziq,

elektromagnit qalbli

biron avlodim?..

 

*

Gugurtçöpday

boşimda

balolar böldiki jam,

jahonimni öt olgay

dunyoga

tegib ketsam.

* hikmat

Dunyo dökonidan

keraksiz molni

olaverdim urho-ur.

Endi mağrur bisotimni ham

sotib yubormoqqa

men majbur…

 

* yetakçilik yuki

Turnalar olisga uçgan çoğ

yurtlardan yurtlarga köçgan çoğ

solişadi kökda arğimçoq –

kuç-quvvatin tejarlar şundoq.

Ammo, eng köp qanot qoqarmiş

Parvoz payti tödaboşi quş.

 

*

Bugun

odam –

odam emas,

odam – atom

(bölinmas va

bölişmas özgalarga).

 

* tilak

sözga  çiqqaningda – zabon

ovga çiqqaningda – kamon

yölga çiqqaningda – karvon

elga çiqqaningda – imon

pand bermasin

heç qaçon!

 

*

Yor.

Yot.

Yov.

Birgina tovuş bilan

yaqin yoki

yiroqmiz darrov.

 

* taqdir

 

Boşida aylangan

qança-qança

tegirmon toşlari

un bölib ketganiga

hali-hamon hayron

şu uvoq bir don.

 

* maniken

 

Muhtaşam dökondagi

zarhal oyna ortidan

öşşaygan bu pörimga

jon ham ato etilsa –

“tomoşaqovoq”ligidan

bölardi-da xöb izza.

 

* arz

 

Vujud bilan olişdim qirq yil:

Içsa xarob qiladiganni içirdim,

Yesa azob beradiganni yedirdim.

Bu yoğiga tan çiqdi epçil:

Içiş mumkin bölmaganni içirgay,

Yeyiş mumkin bölmaganni yedirgay.

 

* tuyuq

 

Köngilga

ayriliq doği

doğ solar doği va doği

qaçon

visol avvali-yu

bu hajrning adoği?

* bahsning davomi

 

Bahsimizdan

tuğilgan

haqiqatning

otasi

senmi

yo men?..

 

*

Rafiqam

taxlaydi sandiqqa

ustma-ust

yozgi kiyimlaru

issiq kunlar

halovatini.

 

* Mahmud Koşğariy

 

Nomusing kamzuliga

til bilan qadalgan

tuhmat tugmaçasin

tişlab

yeçolmaysan,

uzolmaysan ham…

 

* jaholat

 

“BIZ – TÖĞRIMIZ!”, deb

Tom baravar şior yozdilar

lekin

mualliflardan biri

“T” harfini

ömarib ketdi sekin.

 

* riyokorlik

 

Qayçi

oğuşini

qança

keng oçar –

demak kesmoqligi

şunça muqarrar.

 

* luqmayi halol

 

Yölakdagi hakka

çöçimadi-uçmadi,

aksinça, taʼnali tikildi tikka.

Uning çala çaqilgan yonğoqlarin

şu yölakdan olgandim terib

yigirma yilça burun…

 

* şafoat

 

Bir kuni saharda

sohilga kelib

hasad, gina, arazlarni

oqizib yubordim

şafoat qayiğiga solib

va ortimga qaytdim baxtiyor, ğolib.

 

* eşik qönğiroği

 

Bu çolğuda

hamma

faqat

bitta kuyni

çalgani –

çalgan.

 

* nafosat

 

Göyo suv sathiga

oyoq qöygandek

bir ohista qadam bosar ul.

Nazarimda hozir, şu lahza –

tuflisin uçidan

halqa-halqa yoyiladi yöl.

*

Yomğir tugar

Yoğdu ham tark etar falakni

tabiat

ranglarga bölaklab, tugar

va asrab qöyar kamalakni

keyingi galga.

 

* taʼsir

Manzilingni sörar edim

ilkimda qöltelefon –

örtamizga tuşdi qulab

manzilidan çalğigan

ari şörlik

nogahon.

*

Samodagi

Yulduzlarning

olis haroratidan emas,

sunʼiy yöldoşlarning

yaqin nazoratidan

baʼzan qisadi nafas…

 

*

Raqamlar asrida

raqamli texnika

sehridan sarmast

“raqam”laşaverib

sözlaşişni

unutmasak bas…

 

* faxr

 

Samarqand. Yulduzli oqşom.

Samoda yangi (eski) oy.

Navoiy, Uluğbek yo Temur bobom

qaçondir şu oyga boqqan hoynahoy

men turgan manzildan

mendek mahliyo.

 

*

Umr borho kam qoliptur.

Umr – çindan ham qoliptur.

Özni siğdirmoq-çun qolipga

Boşdan boşladik, oxir –

Qoliptur oyoqlar siğmay,

Boş ham qoliptur!..

 

* soğinç

 

Hali

qiş ham

boşlanmay turib

körgim keldi yana bahorni

uç oyga pattalar

oldim oldindan.

* imkonsizlik

 

Har bir daqiqa –

oltmişta mix qoqilgan

eşik.

Qayta oçay desang

qança eşiklaring

yana berk…

 

* taʼrif

 

Palakka oçilgan

suv bilan

serob

semizötdek

orsiz, tekinxör

janob…

 

*

Kuyadori hidi…

ğijimlik…

uniqiş…

eski paltomga ham

malol keldi

qiş.

 

*

Qança davom etar

bilmam

sevgi degan

yangi tuş

rangli tuş

ohangli tuş!..

 

* şubha

 

Xotira

nainki odamda,

kompyuterda ham bor.

Lekin qalbni

mikroçipga köçiriş –

eh-hey, duşvor iş…

*

 Istayman

istaklarimni.

Lek

istaklar

istasa –

netay…

 

* tarbiya

Bandadan

najot kutar

dilbandi.

Afsuski

banda – band

banda – bandi.

* gazetada xato ketgan

raqamlar

Siz – oşkora pinhonim

va qiynalgan vijdonim

oçiq qolgan tovonim

gumonimu puşmonim

yomonlardan yomonim

duşmanim…

*

Xotira diktofoni –

eng dahşatli qurol.

neça kunki

xato ketgan sözlarimni

takrorlab

puşaymondan öldirdi meni.

*

Parişon

quş misol

har nafasimni

qalbni

sovutmoqqa

sarflayman (uvol)…

 

Ğulom MIRZO

“Yoşlik” jurnali, 2011-yil 8-son

“Yoşlik” jurnaliga obuna böling · indeks 822

Obuna haqida

Izohlar

Hozirça izoh yöq. Birinçi bölib fikringizni yozing.

Siz nima deysiz?

Izoh tahririyat körib çiqqaç, eʼlon qilinadi.

Şu ruknda köp öqilganlar

Barçasi (375)