Opa-singil tortishuvi
– Iya, mening ayiqcham,
Izlab yurgandim uni.
Yana so‘ramay olsang,
Aniq uraman seni.
O‘tgan kun ham yo‘qoldi,
Shunda ham sen olganding.
– Urma, kecha tushimda,
O‘zing sovg‘a qilganding.
Ulg‘ayish
Opasining tuflisin
Kiyib Hanifa shodon.
Onasi der: – Darhol yech,
Yo‘qsa o‘zingga yomon.
– Jonga tegdi hammaning
Kichkinasan deyishi.
Hadeganda bahona
Topib, tinmay koyishi.
Shu boisdan opamning
Tuflisini kiyganman.
Endi koyiyvermaysiz,
Qarang, katta bo‘lganman.
Nochorlik
Bo‘ri yotar och-nahor,
Oldida o‘ynar quyon.
Bu holni ko‘rib tulki.
Sababin so‘rab hayron.
– Ha, oshna nima bo‘ldi,
Yo, og‘riyabtimi tish?
– Daydib qolibsan makkor,
Uyingda yo‘qmidi ish?
– Tinchlikmi, holing yomon,
– Haliyam qoldim omon.
Agar nafsni tiymasam,
Ovchilar qilar tamom.
Endi qo‘y bo‘g‘izlasam,
Mergan qaytar ishiga.
Sal qoldi “Qizil kitob”
Bag‘riga olishiga.
To‘qqiz raqami
– To‘qqiz katta son emish,
Aslida u qarigan.
– Nega unday deysan, Xol,
Uni ko‘plar tanigan.
– Yozsam, doim katakda
Bir chekkaga suyanib
O‘zi zo‘rg‘a turadi,
Hassasiga tayanib.
Naima Anvarova
1998-yili tug‘ilgan.
Respublika yosh ijodkorlarining Zomin seminari ishtirokchisi.
O‘zbekiston Yozuvchilar uyushmasi tomonidan “Birinchi kitobim” ruknida “Makka va hakka” nomli she’riy to‘plami chop etilgan.
