* * *
Kelmang, menda hech narsa yo‘q,
Topa olmaysiz…
Ruhimda faqat xazonlarning shitirlashlari…
Men shunday mavhumman, xayolday mavhum
Ko‘nglingizga uraman birdan.
Azobman, o‘ziga sig‘magan lahza
Sochilib ketaman og‘riqqa, she’rga.
Tuningizni baribir qilmayman xushbaxt,
Kuningizda quyoshdek jaranglamasman.
Azobga sochilib sokin tortgan dunyoman,
Yodingizni kezib yurgan xayolparastman.
Kelmang, menda hech narsa yo‘q,
Topa olmaysiz,
Ruhimda faqat xazonlarning shitirlashlari.
To‘kilib-to‘kilib sokin tortgan dunyoman.
SAROSIMA
Go‘yo kimdir kelgan meni so‘roqlab
Yoki kimdir ketgan manguga tashlab.
Shunday sarosima qo‘ynida bu tun
Hamma narsa ostinustin yurak ichida.
Yo sen kelgansan-u, ketgansan zumda.
Sen ruhimni yoqqan mangu sarosimasan.
Men esa sig‘inib yashayman oyning nuriga
Va senga dosh bergum, ey sarosima,
shu xira yorug‘ning saboti bilan.
Va men seni sevarman shundoq xatarli,
Har lahza sevarman
Qayg‘u va quvonchning juda uzun hayoti bilan.
* * *
Onajon, men shahardan boraman sizga,
O‘ylarim ichidan kelaman yelib,
Men sizga bir sokin dunyo eltaman,
Quyoshlar, daryo, to‘fonlar
Ul sokin dunyoga urilgan kelib.
Ul daryoga oqqan achchiq yoshingiz,
Ul to‘fonda mening qahrim, kurashim,
Bir quyosh sizga hech eltmagan quyoshim.
Men sizga bir sokin dunyo eltaman.
Tillaniso ESHBOYEVA,
Respublika yosh ijodkorlarning Zomin seminari ishtirokchisi